阿妹今晚喺台北小巨蛋開騷,粉絲瘋狂﹗(台灣蘋果日報圖片)
張惠妹戴誇張頭飾開騷
粉絲大嗌「阿妹加油!」
建立時間: 0404 21:31
天后張惠妹(阿妹)十場嘅「烏托邦世界巡演」,今晚喺台北小巨蛋揭開序幕,噚晚總綵排仍然發燒嘅佢,上台前一度焦慮,以2億元台幣打造嘅城門、2噸重女王頭、冰柱燈等舞台設計相當壯觀,阿妹除咗唱自己招牌歌外,仲選唱蔡依林新歌《我呸》。
阿妹今晚喺15公尺高的烏托邦城門內,獻唱新歌《戰之際》,隨後城門緩緩打開,戴住5公斤重華麗頭飾、穿黑篷紗裙嘅阿妹,坐喺鑽石型升降台女王椅上,從天而降,演唱新歌《怪胎秀》,全場觀眾high爆,而阿妹亦狀態一流。
隨後阿妹接連演唱《開門見山》、《黑吃黑》、《牙買加的檳榔》等歌,之後阿妹身穿紅色帥氣長大衣、內搭黑金流蘇裝,獻唱近15分鐘招牌舞曲,包括《你在看我嗎》、《維多利亞的秘密》等多首金曲,讓全場情緒高漲。
上月初阿妹飽受喪姊之痛,令佢心力交瘁,而現場有工作人員偷偷安排粉絲讀信畀阿妹聽嘅橋段,最後仲帶領全場大喊「阿妹加油!」,場面感人。
阿妹身為同志教母,今晚吸引大批同志粉絲捧場,當佢唱到《愛是唯一》、《彩虹》時,一樓嘅觀眾被巨大彩虹旗覆蓋,場面壯觀。
http://hk.apple.nextmedia.com/enews/rea ... 4/53602860